Галина Нестерова.Тырмö тай сямыс быдлаö

Сиктса прöстöй мортыд ичöтсянь уджö велалöмнад öдвакö вермас весь овны. Тöлын кöть гожöмын, тулысын кöть арын - во гöгöр чöж горт дорад пыр мыйкö сюрö вöчны. Кыдзи тайö аньыслы, Кулöмдiнысь Нина Ивановна Тимушевалы.
Ачыс сiйö эськö Пармаысь. Бать-мамыс скöт видзöмöн да му вылын мырсьöмöн быд уджö туйдiсны и челядьсö. Торйöн уна сюрлiс нылыслы, Ниналы, öд керка пытшкын колiс отсасьны и мамыслы.Том дырйиыс олöмыс аньöс вайöдлiс быдлаö: вевъялiс верöс сайö петавны, ветлыны Зöвсьöртö, уджавны сэнi фанера вöчан заводын да нянь пöжаланiнын, чужтыны кагаöс. Кольöм нэмлöн 1990-öд воясöдзся сьöкыд кадö бöр бергöдчис гортланьыс. Овмöдчис нылыскöд юрсиктö бать-мамыслöн кыпöдöм керкаö. Сёрöнджык найö асьныс Пармасьыс вуджисны татчö овны. Öтувтö öд гажаджык.Юрас воис мöвп видлыны вöчны гын сапöг. Батьыс ёна ноксьылiс тайö уджнас. Но томджыкнад пыдди эз пуктыв ни эз велöдчыв сылысь вöчасьнысö, нинöм на эз ков. Жалитiс ёна, мый сылöн ловъя дырйиыс эз велöдчыв, эськö быд воськов лючки туйдiс. Лун и вой думайтiс та йылысь, узьнысö весиг эз вермы. Но аслас гуся мöвпсьыс эз лэччысь, Михаил вокыс дорö шыöдчылiс тайö могнас, öд сiйö сяммö жö гын сапöгсö вöчнысö, со и петкöдлiс-велöдiс сiйö чой морттö.- Гын сапöг вöчöмыд, вöлöма, зэв ыджыд, сьöкыд удж, - водзö сёрнитiс ань. - Пырöн эг на и велав, öти ног да мöд ног вöлi панла, коркö сэсся и артмыны кутiс.Унаöс, дерт, шензьöдö аньлöн тайö кöмсö вöчöмыс, шуасны, кöнкö, мый тайö айловлöн удж. Но кодкö вермас-ö мöвпыштны, мый Нина Ивановна сяммö весиг и пач тэчны. Верстьö арлыдöдз олiс да некор и мöвпыштлыны эз кужлы, мый коркö сяммыны кутас вöчны пач. Тайö уджас велöдчыны мöвпыс юрас воис виччысьтöг жö.Нимкодь аньлы, мый кöсйöмторсö збыльмöдiс, велöдчис нöшта öти ыджыд уджö. Велалöмвывсьыс пачьяс вöчис и орчча керкаын олысьясыслы, аслас öнiя мастерскöйын да гортас на.Шуны кö, сылöн сямыс быдторйын, и кытчö кöть оз кутчысь, ставыс артмö лючки.